რატომ უნდა გადავცვალო

წმინდა წყარო მღვრიე რუში,

რატომ უნდა ვანაცვალო 

ჩემს წმინდანებს სხვისი მრუში.

სხვათა ხელში შემომყურემ

თვითონ სხვათა საპატრონომ

ჩემეული ეზო-ყურე

რატომ უნდა გადატორონ.

თავქეიფა ლოთი-ფოთი

ჩემი ბრძენი ხალხის შემდეგ,

ვის ცოდვებსაც ვერც კი მოთვლი

რატომ უნდა მარიგებდეს.

რატომ დადის ყველა მავნე

ჩვენს აკრძალულ გაზონებზე,

სხვათა ტანზე მოჭრილ თარგებს

ჩვენ რად უნდა გვაზომებდნენ.

ან როდემდე ვაყმუვლებდეთ

ჩვენს ეზოში სხვათა ძაღლებს, 

ან სეირის მაყურებელს

ვპატიობდეთ სისაძაგლეს.

ან როდემდე ოდა- სახლი

მივაქვავოთ უცხო- ნაცნობს,

ბედის კვერი ჩვენი ხალხის

დროა თავად ჩვენვე ვაცხოთ.

დროა, ცრუ და ქვეშ- ქვეშ მძრომი,

ღვარძლით სავსე დარბაზები,

აღარ გვთვლიდეს ქვეშევრდომად,

არ გვიტევს გაბრაზებით.

დროა გულის ამოკივლის,

ჩვენს რაინდულ  წესს და ჩვევებს

აღარ ედოს ჯაჭვ- ბორკილი

"გვეყუდნოდეს თავი ჩვენვე".

ამ პატარა მიწის მხრებმა

როგორ ზიდოს ცოდვა კრემლის,

რატომ უნდა აცხონ სხვებმა

საქართველოს ბედის კვერი.