მე ვერ ვიტყვი

აჭარა თუ გურია,

მე ვერ გავყოფ

კახეთი თუ რაჭა,

ბარი მთაზე 

ისე გადაბმულია,

ბზარი რაა - 

ერთი ბზარიც არ ჩანს.

სადაც წაველ

ყველგან გაზაფხულია,

თოვლი მხოლოდ

მყინვარწვერზე დარჩა,

ყველგან ჰყვავის 

საქართველო სრულიად,

ყველგან ფეთქავს

ერთი დიდი მაჯა.

სვანურია ის თუ

აფხაზურია - 

სისხლი ბორგავს

ადუღებულ მაჭრად,

ყველგან ჩემი დედის -

ცხელი გულია -

ღმერთმა ნუ ქნას 

ნაწილ-ნაწილ დაჭრა.

ვის რას ვკითხავ - 

ქუდი სადაურია,

როცა ძველის  მოგონებაც მტანჯავს,

როცა ყველას ერთი ცა გვახურია - 

ვარსკვლავებით მოოჭვილი ფარჩა.

ყვირილაა, თუ შმაგი ენგურია - 

სამშობლოსთვის

მათაც შვენით გარჯა,

ბნელს თუ უბღვერს 

განა სისხლი სწყურია -

მტკვარს,

თბილისის

მოლაპლაპე 

ხანჯალს.