კატეგორიები

წერილის გაგზავნა

lock პაროლის შეხსენება
ჯერ არ ხართ რეგისტრირებული?
უკვე ხართ რეგისტრირებული?
210 C
ხუთშაბათი, 19 ნოემბერი 2026 00:41

 

გამითავდა ხიდები,

ისევ აგიხირდები:

გაღმა როგორ გავიდე? -

არ გავალ და გამოღმა დამადგება შავი დღე.


მახსოვს ბევრი ლაფსუსი,

მახსოვს ბევრი აფსუსი,

ბევრი ნაოცნებარი აღარ მეაფსუსება:

თეთრი ღამეები და გასახსნელი ხიდები

შემაძულეს რუსებმა.


აქეთ ვარ და ვჩალიჩობ, კარგი გავაფრიადო,

დათმეს ჩემი გადაღმა სხვათა ეპატაჟებმა,

რას მიქვია რიალტო? -

მშობლიური ენგურიც აღარ მეპატიჟება.


ჩაქრა ყველა იმედი,

თავს ვერ დავიიმედებ ახლა რომელიმეთი,

მტკვარიც მეუარება: უკვე ამოგეწურაო ლიმიტი.


შევშინდი და შიშები ვერ გავაუწყინარე,

უშაირო დღეები ცვლიან შაირიანებს,

ჭყვიშის და ქუთაისის საზიარო მდინარე

ჩემს ფანჯრებთან ვეღარ ჩაირიონებს.


ამოვბეჭდე კადრები ძველი ნეგატივიდან:

ძველი შედარებანი, ძველი მეტაფორანი:

აფსუს ძველი სანავე, აფსუს ძველი ტივი და

აფსუს ძველი ბორანი!


და უეცრად: მიღიმი ფშავის მთების ტიხართან,

ვაჟა მეკაფიება: იქნებ იეშმაკოსო,

მე კვლავ გამოღმითა ვარ, შენ კვლავ გაღმითა ხარ და

როგორ უნდა გაკოცო და მაკოცო?


გაითიშა ხიდების მიეთი და მოეთი,

სხედან მოაჯირებზე ფასკუნჯი და გავაზი,

ყველა - დანარჩენებიც - უნდა იყოს პოეტის -

არა მარტო ტატოსი და გალასი.


ნეტავ, ვიდრე შემეძლო, ერთი ჩემი ამეგო,

ერთად ავშენდებოდით მე და ჩემი საბაჟო,

მესმის ვენეციიდან სანუგეშო "ამიგო",

მინდა გონდოლიერთან ერთად წავიშაბაშო.


თუმცა ბევრჯერ შევაქე მეხიდეთა ელიტა

ძველთა მენავეთა და მოგზაურთა მოტივით,

ხელს ვერ გამომიწოდებს ჩემი ეიფელი და

თვალს ვერავინ ჩამიკრავს ანტონიო კონტივით.


მე არ ვეძებ ნატვრის თვალს და ბრილიანტის მუხუდოს,

ვეძებ: ხიდის მეცენატი ვინმე შემომეხიდოს

ანუ მინიატურული საცალფეხო მიყიდოს,

ღამით სავსე მთვარესავით ამავსოს,

დილით არე-მარე გამილამაზოს...

მე ალაზანს ვედავები და არ ვერჩი ამაზონს.


გამახსენდა რატომღაც მტრედი ნეო-ნოესი,

შევადარე ერთმანეთს ის წლები და ეს წლები,

ერთიც დააპროექტეს მტკვარზე ნეო-ნიუსი,

მაგრამ ვეღარ მომისწრებს ანუ ვერ მოვესწრები.


ჩემი ნამდინარევი ამოშრა და ამოხმა

და ვიჯერებ სათავისო მაქსიმას:

იწურება ჩემი გაღმა-გამოღმა

და მგონია - გაღმა მეტი შანსი მაქვს.


ნეტავ, ნეტავ, ნეტავში ბევრი ნეტავებია,

მესმის: თამაშ-გარეშეა თავიო

და, როდესაც ეჭვები ეჭვებს ედავებიან,

გულის გული მაქეზებს: გაღმა შეედავეო.


გაღმა დამრჩა ქებული და კრებული,

იისფერი იები და თეთრი კამელიები

და რიონის ტალღით გოფრირებული

თეთრი ქვების თეთრი ბარელიეფი.


მე ამ თეთრებს ვეღარავინ ვეღარ გადამაყვარებს,

ვერ შევისმენ ხანგრძლივი წლების დამუნათებას,

ამ ლოდებზე ისე, როგორც დინოზავრის ნაკვალევს,

დავეძებდი იაზონის ნატერფალს.


ეს თეთრები ირეკლავენ ვარსკვლავების პა-დე-დეს,

ამ თეთრებმა, როდესაც შევადარე ციტადელს,

ამიყვანეს ხიდზე და იქვე დამაპატენტეს

ანუ დამაციტატეს.


ეს თეთრები გახლავან ვარსკვლავების ხნისანი,

მესმის ქვათა ღაღადი, მესმის სხვათა ქვათა ხმა,

ამეკიდა კითხვის ერთი ნიშანი:

რომელია მაინც შენი გადაღმა?


სახლი ჩემი რიონთან იყო ჩემი ციხე და

ახლა მამუნათებენ გაყიდული კედლები,

მამასავით ფანჯრიდან ხიდმა შემოიხედა,

მაგრამ შვილი უძღები ვეღარ შევეგებები.


წარსულსა და სინანულს ვეღარ გამოვისყიდი

გამოღმიდან, რაკიღა მწყრალადა ვარ ბიზნესთან,

უკვე ჩატეხილია ეს ხიდი და ის ხიდი,

აი ჩემი მიზეზი და მიზეზი მიზეზთა.


დრო ვერ დავაბალანსე წლების აკრედიტივით

და ასაკი არასდროს მომიმიზეზებია,

ლექსი გამიჭიანურდა სან-ფრანცისკოს ხიდივით

და სტრიქონი თითქოს მისისიპია,

და სიბერის სატანამ მწარედ ჩაიხითხითა

და რეპლიკა მაფრთხილებს აგერ ამასწინდელი:

აფსუს თეთრი ხიდი და

აფსუს ჯაჭვის ხიდი და

აფსუს ხიდი წითელი!


გამიღიმე მეორედ: თითქოს გამომაღვიძე,

სატიალო მდინარე: მეც უნავო, შენაცა,

გაღმა ხარ და შუა ხიდი არ გვიძე,

ვერ გადმოვედ, მოწამეა ზენა ცა.


თუმცა თვალმა ცა იგი ვერ მოიასპარეზა,

ვერ გათვალა ტალღების აჩქარების პიკი და

ფანჯარასთან რიონზე მეზობელმა კარისა

შუშაბანდის ტიხარი უკვე გადმომიკიდა.


მაპატიე, მკითხველო, ჩემზე უფრო ჭკვიანო,

შაბაშ! აღარასოდეს წავირეპეტიტორებ,

სალამი და ანდერძი ერთად დაგიგვიანე,

გამითავდა ხიდი და ვეღარაფერს გიტოვებ.


კმარა, ბევრი გავცვითე წუღა-მესტი მეწაღის,

ბევრი მახსოვს ნაძვის ხე, კვლავ სურნელი მეცა ხის,

ბევრი ახი მესმის და შევაგებე მეც ახი,

გამითავდა ხიდი და მეძახიან, მე-ძა-ხი...

 

პოეზიის გვერდი   • • •  პოეზია - ვახტანგ ჯავახაძე  • • •   ვახტანგ ჯავახაძის პოეზია

შეიძლება დაგაინტერესოთ

ოჩოპინტრე

გაგაგა



ფდფდფ

ოჩოპინდრე

₾
შეიძინეთ პაკეტი

მიიღეთ შეუზღუდავი წვდომა

ერთი კვირა
3 ლარი
ორი კვირა
5 ლარი
ერთ თვე
7 ლარი

დაამატეთ Aura.Ge

დააჭირეთ:   Share
აირჩიეთ:   Add to Home Screen