მთარგმნელი: ვახუშტი კოტეტიშვილი
|
* * * * * * *
ყოფნა-არყოფნის საიდუმლო აუხსნელია ეს მარგალიტი კაცის ხელით აუსხმელია; ბევრი რამ თქმულა, რომ აეხსნათ გონების ძალა, მთავარი მაინც დაფარული და უთქმელია.
* * * * * * *
მე გლახაკი ვარ და შენს სახელს ვახსენებ წმინდად, ათასმა მეფემ ვერ მომიზღოს, რაც მინდა მინდად, ღმერთო, ყოველი სულიერი რაღაცას შეგთხოვს, მეცა მაქვს თხოვნა: მთელი შენი არსება მინდა.
* * * * * * *
გუშინ მოვედი ამქვეყნად და ვერ-რა ვიღონე, დღეს ქვეყნის ბაზარს ვუმზირე და გული ვიღონე, ხვალ წასვლა მიწევს, საიდუმლოს ვერ-რა გავუგე, და ამა ქვეყნად რისთვის მოველ, ვერ მოვიგონე.
* * * * * * *
შენი თვალი გასწავლის, როგორ უნდა ცქერა, სხვას რომ ყველას ხედავს და თავის თავს კი - ვერა.
* * * * * * *
არ ვიცოდი, ვიდრე ძალა მქონდა, ვისწავლე და - აღარა მაქვს ძალა. |


