კატეგორიები

წერილის გაგზავნა

lock პაროლის შეხსენება
ჯერ არ ხართ რეგისტრირებული?
უკვე ხართ რეგისტრირებული?
210 C
ხუთშაბათი, 19 ნოემბერი 2026 04:51

 

მაიმუნი

 

მაიმუნი პრანჭია,

სახე დაუმანჭია,

დარბის, დახტის, ქაქანებს,

საქანელას აქანებს.


რასაც მისცემ, აფუჭებს,

გესვრის თხილის ნაჭუჭებს.

რა სუფთაა, რა სუფთა?!

თავზე იყრის ნასუფრალს.


ქცევა აუტანელი,

ხელპირდაუბანელი,

ბაძია და წუნია,

მართლაც მაიმუნია.


რომ არ ვამბობ არაფერს,

შენ გგონია, არა მწყინს?

დედიკო რომ ხანდახან

მაიმუნოს მეძახის!

 

სპილო


სპილო გაგიგონია?

დიდზე უფრო დიდია,

ცხვირის ნაცვლად ძლიერი

მას ხორთუმი ჰკიდია.


ვაშლი, პური, შაქარი

იმით მიაქვს ხახაში,

უყვარს ჩვენი ყურება,

სიცილი და თამაში.


ერთხელ სულაც არ შერცხვა,

არც კი მოიბოდიშა

და ხორთუმით სუყველას

თავზე წყალი მოგვიშვა.


დაგვასველა, გაგვწუწა,

წაგვამწარა სტუმრობა,

გეფიცები, ხანდახან,

სულ არ იცის ხუმრობა.


ისე მუდამ წყნარია,

დინჯია და მშვიდია,

მიყიდიდა მამიკო,

მაგრამ ძლიერ დიდია.

 

აქლემი

 

კუზიანი აქლემი

არასოდეს გინახავს?

ამბობენ, რომ კუზებში

წყალს და საჭმელს ინახავს.


კუზში საჭმელს რა უნდა?

ჩემო კარგო, არადა...

საწყალს, ალბათ, არა აქვს

განჯინა და კარადა.


კენჭები თუ ესროლე,

ცოტა თუ შეაწუხე,

ვითომ არაფერია,

ისე შემოგაფურთხებს.


მერე რა, რომ მთასავით

გაზრდილა და გრძელია,

მე თუ მკითხავ, ნამდვილად

დიდი გაუზრდელია.

 

ლომი


იქით მთელი მხეცების

მეფე-ლომი ღრიალებს,

ცოტა ახლოს თუ მიხვალ,

თვალებს დაგიბრიალებს.


კბილებს გააკრაჭუნებს,

ტორებს დაჰკრავს გალიას,

ჩვენ კი არა, დიდებსაც

ეშინიათ ძალიან.


ახლოს არვის იკარებს,

არავის სცნობს სრულიად,

ამიტომაც თამაში

ლომთან აკრძალულია.

 

ვეფხვი


ლომის გვერდით ვეფხვია,

ისიც მტაცებელია,

სულ კატას ჰგავს ხატულას,

კატასავით ჭრელია.


ვეფხვსაც, ლომის არ იყოს,

სულ არ უყვარს ბავშვები,

არც ვეფხვია, თუ მკითხავ,

სახლში შემოსაშვები.

 

შველი

 

შველის არ მეშინია,

წინ ბალახი უყრია;

იქვე რომ დაკუნტრუშობს,

პაწაწინა ნუკრია.


შენ გგონია, ვეფხვივით,

მისვლის ნებას არ მომცემს?

ერთხელ მოვეფერე და

შიგ ტუჩებში ვაკოცე.


ვერ დატკბები ვერასდროს

შვლის და ნუკრის ყურებით,

როგორა აქვთ, თუ იცი,

დაცქვეტილი ყურები!


ასე ნაზი ცხოველი

ზოოპარკში არც კია,

ჩვენს ბეკეკას ჩამოჰგავს,

მაგრამ უფრო კარგია.

 

მელია

 

სოფელში რომ ბევრია,

აქაცა ჰყავთ მელია,

შენ კი იცი, მელია

რარიგ საძაგელია.


ო, რამდენი დედლის და

მამლის სისხლი დალია!..

აქ ამ ქათმის ქურდებით

სავსე არის გალია.


გახსოვს, ჩიტი ჩიორას

ტირილი და გოდება?

სულ ცრემლები მახრჩობენ,

როცა მომაგონდება.


აქ თავს იკატუნებენ,

არ არიან მადაზე,

ზოოპარკის გალია

ახი არის მაგათზე.

 

დათვი

 

ყველას დათვი სჯობია, -

ბანჯგვლიანი დათუნა,

მუდამ გვებურტყუნება

მე, მზიას და ხათუნას.


ცეკვაც იცის, თუკი სთხოვ,

თუმცა თხოვნა რად უნდა,

- ტაში, ჩემო დათუნა!

- დაუარე, დათუნა!


ისე მიყვარს, ეს დათვი,

სულ მის ცქერას ვუნდები,

რამეს რომ არ მატკენდეს,

გულში ჩავეხუტები.

 

პოეზიის გვერდი   • • •   პოეზია - ნოდარ დუმბაძე  • • •   ნოდარ დუმბაძის პოეზია

შეიძლება დაგაინტერესოთ

ოჩოპინტრე

გაგაგა



ფდფდფ

ოჩოპინდრე

₾
შეიძინეთ პაკეტი

მიიღეთ შეუზღუდავი წვდომა

ერთი კვირა
3 ლარი
ორი კვირა
5 ლარი
ერთ თვე
7 ლარი

დაამატეთ Aura.Ge

დააჭირეთ:   Share
აირჩიეთ:   Add to Home Screen